KAKAWIN RAMAYANA

     Prabu Dasaratha saka negara Ayodya kagungan putra papat : Rama, Bharata, Laksmana saha Satrughna. Sawijining dina ana Resi aran Wiswamitra sing njaluk pambiyantu marang Dasarata kanggo mbebasake pratapane saka para raseksa. Rama lan Laksmana banjur budhal.

    Ing pratapan kasebut, Rama lan Laksmana mateni kabeh raseksa banjur nuju menyang negara Mithila amarga ing kana ana sayembara kanggo nglamar salah sijining putri kang sulistya aran Dewi Shinta. Sayembara kasebut yaiku menthang gendhewa sing mbiyen bareng karo laire Dewi Shinta. Nanging ora ana siji-sijia ksatria sing bisa nglaksanakake syarat kasebut kejaba Rama. Mila Rama kasil nggarwa Dewi Shinta lan Shinta kaboyong menyang Ayodya. Ing Ayodya, Rama bakal kajumenengake nata nanging salah sijining ibu tirine yaiku Kekeyi nagih janji menawa Barata sing bakal jumeneng nata. Sanajan kanthi abot ing manah, Prabu Dasarata nyanggupi janji kasebut. Rama lan Shinta dikantheni Laksmana lunga saka Kraton. Ora let suwe, Prabu Dasarata seda. Barata banjur nggoleki Rama lan ngersakake Rama dadi raja amarga dheweke rumangsa ora pantes dadi raja. Nanging Rama nampik lan malah menehake sandhale marang adhine, Barata kaya dene kekuwasanae.

   

Rama, Shinta lan Laksmana manggon ing alas Dandaka. Ing kana ana sawijining raseksia aran Sarpanakha iya adhine Dasamuka sing kasengsem marang Laksamana. Dheweke njelma dadi wanodya sing ayu kanggo ngrayu Laksmana nanging ora kasil malah irunge tanpa sengaja kakethok dening Laksmana. Dheweke murka banjur wadul marang kangmase, Dasamuka. Dheweke mbujuki kangmase kanggo ndhusta Dewi Shinta iya mbakyu ipe Laksmana.

Dasamuka banjur nuruti kekarepane adhine. Panjenengane ngutus Marica kanggo nyulik Shinta. Marica mindha dadi kidang mas sing banjur narik kawigatene Shinta. Shinta njaluk kidang kasebut marang garwane. Rama ninggal Shinta lan dititipake marang Laksmana banjur dheweke ngoyak kidang mas kasebut. Kidang Mas angel banget dicekel, banjur dipanah dening Rama sing nyebabake panjerite Marica. Shinta ngira yen sing njerit Rama, Laksamana banjur kautus marani Rama dene Shinta ditinggal dhewekan lan kasil kadhusta dening Dasamuka.  

     Jeritane Shinta keprungi dening peksi Jathayu sing tau dadi kancane Prabu Dasarata. Peksi Jathayu banjur ngupaya kanggo nulungi Dewi Shinta nanging ora kasil. Dheweke malah kalah lan sekarat. Begja Rama lan Laksamana nemokake Jathayu, sadurunge mati Jathayu isih bisa atur palapuran yen Dewi Shinta kadhusta dening Dasamuka saka Alengka.

     Kanggo njupuk garwane, Rama njaluk tulung marang wadyabala wanara aran Sugriwa. Sugriwa gelem ngrewangi Rama nanging kanthi sarat Rama uga gelem ngrewangi Sugriwa numpes sedulure sing wis nyolong garwane yaiku Subali. Kekarone sarujuk. Sugriwa banjur ngutus sawijining kethek putih iya Anoman kanggo nggawa bali Shinta. Singkating carita Shinta bisa kagawa bali dening Anoman.