KAKAWIN ARJUNAWIWAHA

     Ana sawijining raseksa aran Niwatakawaca sing arep nyerang kahyangan, donyane para dewa. Raseksa kasebut sekti mandraguna tan ana sing bisa ngalahake. Dewa banjur njaluk pitulungan marang manungsa. Panjenengane banjur nemtokakee pilihan marang Arjuna sing lagi tapa ing Gunung Indrakila.

Ananging sadurunge Arjuna kautus kanggo ngalahake raseksa Niwatakawaca, dheweke kudu diwenehi pacoban kanggo nyoba katabahane lan kasektene. Banjur widadari cacah pitu kautus dening Dewa kanggo nggodha Arjuna ing antarane yaiku Tilottamā lan Suprabhā.

     Kekaro widodari sing ayune wis kawentar ing jagade para Dewa kasebut nggodha Arjuna kanthi pirang-pirang cara nanging mung muspra, amarga Arjuna babar pisan ora kegut marang rayuane kekaro widodari kasebut. Kanthi rasa kuciwa Tilottamā lan Suprabhā bali menyang Kahyangan lan matur dhumateng Dewa Indra. Para Dewa bungah nampa kanyatan kasebut, nanging isih ana siji sing tansah gawe Dewa mangu-mangu, apa tujuaning Arjuna tapa brata namung kanggo golèk kabahagiyan lan kakuwasaan tumrap Arjuna, saénggo Arjuna ora perduli tumrap kaselamataning wong liya? Kanggo nguji bab kasebut, Dewa Indra nemoni Arjuna kanthi njelma dadi wong tuwa. Panjenengané ditampa kanthi nyenengake.

Ing sekabèhing wujud, kabahagayaning suwarga, kanikmatan lan kakuwasaan ing donya iku semu. Sapa wong kang pengin nggayuh kasampurnan kudu ngléwati donya ujud lan wewayangan kang kleru, aja nganti kabendung. Kuwi mau sing diandharake dening Arjuna. Panjenengané negesaké, dèné tapa bratané mung nglakoni kawajiban kșatriya sarta mbiyantu kangmase, Yudhișțhira kanggo njupuk maneh Kratone. Dewa Indra banget mongkok marang Arjuna, panjenengane nuli kondur menyang Kahyangan.

     Raja para Raksasa wis ngerti kedadeyan ing Gunung Indrakila. Dheweke banjur ngutus raseksa Muka kangggo mateni Arjuna. Raseksa mau awujud celeng lan ngrusak alas. Arjuna kaget, panjenengane banjur metu saka pertapane. Nalika semana, Dewa Siwa wis mireng dene Arjuna nglakoni tapa brata kanthi becik. Panjenengane banjur mudhun, nalika mangerteni ana celeng Dewa siwa uga ngeculake panah bebarengan karo panahe Arjuna. Panah mau nyawiji gawe perkara ing antarane Arjuna lan Batara Siwa sing lagi nyamar. Kekarone banjur prang tandhing lan perang kasebut dimenangake dening Arjuna. Dewa Siwa banjur malih ing wujud asline. Arjuna banjur muja marang Dewane. Dheweke banjur kaparingan panah Pasopati lan cara migunakake.

     Singkating carita, Arjuna banjur ngadhep marang para Dewa lan nampa printahe para Dewa kanggo numpes raseksa Niwatakawaca. Kanthi kasektene Arjuna bisa numpes raseksa kasebut. Para Dewa matur nuwun tumrap Arjuna, mila Arjuna entuk hadhiah saka Para Dewa yaiku Dewi sing paling ayu sajagad Supraba.