BELAJAR DARI RUMAH BAHASA JAWA KELAS XI (MINGGU KE-2)

Assalammu’alaikum.wr.wb

Sugeng Enjing Cah,

Dina iki Bu Tyas arep nerusake pasionaon crita rakyat ya. Crita rakyat iku salah crita sing ngrembaka ing salah sawijining papan panggonan. Nha coba sebutake crita rakyat sing ngrembaka ing Wonosobo? Iya ana Legendha Kawah Si Kidang, Legendha Candhi Dieng, Rambut Gembel, lsp. Crita rakyat iku kalebu crita fiksi ya Cah dadi iku dudu crita kang nyata. Crita rakyat iku jaman biyen biasa dinggo panglipur bocah-bocah cilik. Seje karo jamanmu saiki sing akeh panglipur kaya game, tv, lsp, jaman dhisik panglipure ya salah sijine lumantar crita. Crita rakyat iki ora mung crita. Awake dhewe ora reti sapa sing ngarang crita rakyat iki utawa bisa disebut anonim.  Nanging akeh pitutur luhur kang bisa dijupuk saka crita rakyat kasebut. Kaya crita rakyat Dumadine Rawa Pening sing wis mbok tonton wingi. Iya kabeh wis bener yen crita iki kawentar ing tlatah Kabupaten Semarang. Nyritakake bocah bajang aran Baru Klinthing kang disiya-siya dening para warga desa. Nanging, ana salah siji kang becik budine iya Mbok Randha kang nulungi Baru Klinthing nalika dheweke ngelih lan butuh mangan.

                Nha bocah-bocah, saka crita kasebut pitutur apa kang bisa dijupuk? Iya dadi awake dhewe minangka manungsa iku kudu duwe rasa tepa slira lan seneng tetulung. Manungsa iku ora bisa urip dhewe, mesthi bakal  butuh karo manungsa liyane. Mula aja ngandhapake wong liya. Kabeh manungsa duwe hak padha kanggo urip. Kaya warga Desa Banarawa kang umuk kae, ya mesthi wong sing sombong lan srakah iku bakal ngundhuh kacilakan. Kabeh wis dadi hukume Gusti Allah sing nandur ya ngundhuh, sing nandur becik ngundhuh becik sing nandur ala ya ngundhuh ala. Warga Desa Banarawa kena banjir gedhe lan ora ana kang bisa slamet ya awit siya-siya karo wong cilik lan ora gelem nulungi wong kang lagi nadhang susah kepara malah diece. Ana sing slamet ing panandhang gedhe kasebut, ora liya ya Mbok Randha kang ikhlas nulungi Baru Klinthing lan menehi sandhang pangan marang Baru Klinthing.  Mbok Randha bisa numpak lesung lan alune dadi gayunge. Kabeh iku amarga luhuring budine Mbok Randha.

                Semana uga kowe kabeh Cah. Urip iki kadya cakra manggilingan kang tansah mubeng. Kabeh manungsa bakal ngrasakake seneng lan susah. Nalika lagi seneng lan duwe daya kanggo nulungi wong liya ya awake dhewe kudu ikhlas nulungi. Mengko yen lagi susah ya mesthi bakal ana sing nulungi. Elinga urip iku ora salawase seneng utawa salawase susah. Kabeh seimbang, gari kepiye awake dhewe anggone milih dalan, apa arep dadi manungsa kang becik supaya ngundhuh kabecikan utawa dadi wong sakarepe dhewe kang pungkasane ya bakal cilaka.

                Mula awit Bu Tyas ora kepengin anak-anakku padha cilaka, pasinaon iki fokus karo pitutur luhure Cah. Supaya apa? Ora liya supaya Bu Tyas ing nembe mburi bakal nyekseni kasuksesanmu kang berkah, kabagyanmu kang sejati, lan weruh kowe kabeh dadi manungsa kang duweni akhlakul karimah, tata krama lan sopan santun. Nha iku kang dadi tujuan pasinaon iki. Supaya pitutur-pitutur luhur saka crita rakyat kang wis kok tonton iki bisa koktrapke ing uripmu padinan. Eits nanging aja banjur tulung tinulung ing prakara ala. Kayata nyonto/ngepek, iku jenenge ora nulungi kancane nanging malah mateni pikirane kancane, gawe kancane dadi kesed, yen wis ngono kancamu ora bisa pinter iku uga ana salahmu ing kono. Mula, ayo padha tetulung ing bab kabecikan. Supaya urip iki berkah lan tansah entuk pituduh saka Gusti Allah. Siji maneh, aja mbeda-bedakake kanca. Kanca sing sugih, kanca sing mlarat, kanca sing pinter, kanca sing kulite ireng, kulite putih, ayu, elek, bagus, kabeh kancamu, kabeh wajib dirangkul, supaya ayem tentrem kerta raharja gemah ripah loh jinawi.

                Cah, semono dhisik pasinaon dina iki. Dadiya manungsa kang pinilih budine, budi kang becik, tata krama kang apik bakal nggawa kowe dadi manungsa pinunjul. Sawise iki coba kowe golek crita rakyat kang ngrembaka ing dhaerahmu, banjur critakna nganggo basa krama. Divideo ya! Lan video rekamanmu kuwi dikirim ing kene :

https://chat.whatsapp.com/K8ND4lw6Fw0Kob5y2ITx8n

Join group whatsapp iki lan kirimen rekamanmu ing group iki ya Cah!

Tugase digarap siji mbaka siji supaya ora kakehan lan numpuk-numpuk. Sing sregep bakal mulya sing kesed ndang tobata!  J

                Maturnuwun

                Tak tunggu ya Cah. Sugeng Sinau!

                Wassalammu’alaikum.wr.wb

BELAJAR DARI RUMAH BAHASA JAWA KELAS X (MINGGU KE-2)

Assalammu’alaikum.wr.wb

                Sugeng Enjing bocah-bocah,

                Dina iki Bu Tyas arep nerusake pasinaon minggu wingi. Isih bab crita wayang ya. Kabeh wis nonton video crita wayang Bima Bungkus ya? Nha, bener Bima Bungkus iku kalebu salah siji crita mahabharata. Bima Bungkus nyritakake laire salah siji putra Pandhawa yaiku Bima utawa Bratasena utawa Werkudara. Werkudara iku Pandhawa sing nomer pira? Ya, nomer loro. Wateke kendel lan trengginas. Satriya Pandhawa iki sing paling wasis yen nglawan mungsuh uga tansah maju ngarep dhewe yen ana sing nganggu ibune utawa sedulure. Ibune Bima asmane sapa? Iya, Dewi Kunthi. Kakange kang pambayun aran Puntadewa ya Yudhistira dene adhine yaiku Janaka, Nakula lan Sadewa.

                Sawise kowe kabeh mangsuli pitakonan saka Bu Tyas wingi mesthi wae kowe padha wis bisa nggoleki pitutur saka lakon Bima Bungkus kasebut. Bu Tyas fokus karo pituture ya, awit ngapa? Awit tujuan pasinaon Basa Jawa yen Bu Tyas mung prasaja wae. Supaya kowe kabeh bisa duwe pitutur luhur utawa akhlakul karimah. Bima Bungkus iki nggambarake satriya kang laire ora memper kaya manungsa liyane. Bima lair awujud bungkus, ora ana kang bisa mecah bungkuse. Nanging, Permadi utawa Janaka ikhtiar kanggo golek cara supaya kangmase bisa metu saka bungkusan. Awit kabeh kulawarga padha mempeng anggone ngupaya lan donga, mula Bathara Guru  ngutus Gajah Sena kanggo mecah bungkusan kuwi lan ngutus Dewi Umayi kanggo menehi sandhangan marang si jabang bayi utawa Bima. Iku tegese apa ta Cah? Dadi awit kasabaran lan upaya kang temenan manungsa bakal kasil. Elinga upaya kasebut yaiku upaya kang lumantar dalan kang bener. Kaya kowe misale kepengin entuk biji satus kudu ngupaya kanthi dalan sing bener yaiku sinau lan aja lali donga. Sinau iku tuladha dalan kang bener kanggo nggayuh kekarepanmu dene nyonto utawa ngepek kuwi dalan sing kleru.

                Bali maneh marang crita Bima Bungkus. Ing kana dicritakake yen Bima ing njero bungkus salawase 8 taun. Nha iku tegese Bima lagi prihatin, kuwat ngadhepi kabeh kersaning Gusti Allah. Bima sanajan ing njero bungkus nanging ora mati malah metu bisa sekti. Semana uga kowe Cah, urip iki ora gampang akeh pacoban maneka warna kang kudune bisa gawe kowe dadi luwih kuwat luwih pinter lan luwih temuwa. Mula kowe kudu tansah husnudzan marang Gusti Allah kabeh pacoban uripmu kuwi mesthi mengko bakal gawe kowe luwih mulya yen kowe tansah sabar lan ora gampang nglokro uga tekun nggayuh kekarepanmu. Kosok baline, yen kowe ngadhepi pacoban karo mbesengut, ora trima lan suudzan marang Gusti Allah mesthi wae uripmu malah dadi ra karuwan lan kowe bakal jupuk dalan sing salah mau.

                Nha saka Bima Bungkus mau uga Bima kasil diparingi sandhangan marang Dewi Umayi, iku ora liya amarga Bima iku satriya pinilih awit wis kasil nampa kabeh pacobaning Gusti kanthi sabar. Kowe ya ngono Cah, urip iki kudu urup aja mung dadi manungsa biasa ing ngarsaning Gusti Allah. Dadiya kawulaning Gusti Allah kang pinilih. Carane piye? Iya ora liya kanggo cara amar makruf nahi munkar. Dadiya siswa kang pinilih awit prestasimu, dadiya bocah kang pinilih awit bektimu, dadiya kawula kang pinilih awit iman lan takwamu, dadiya manungsa pinilih awit dedikasimu. :J

                Jane isih akeh lakon crita Mahabharata kayata Karna Tandhing, Pandhawa Dhadhu, Dewaruci, lsp. Nanging iku bisa dirembug mengko ing patemon sabanjure ya.

                
Nha saiki coba goleka lakon crita wayang MAHABAHARATA liyane : (pilihen salah siji)

1. Karna Tandhing
2. Dewa Ruci
3. Gathotkaca Gugur                                                                                                                                                                                                                                                                  Critakna nganggo basamu dhewe ya. Nganggo dhialek Wanasaba ya ora papa kok nanging basa krama luwih apik. Divideo ya terus video rekamanmu kuwi kirimen mrene :

https://chat.whatsapp.com/GhcRrM7YQ5FEO40puaLQ5D

join group whatsapp iki ya terus kumpulke ing kene. Maturnuwun

Oke tak tunggu ya Cah. Sugeng Sinau J

Wassalammu’alaikum.wr.wb

CRITA RAKYAT

sumber video : skripsi TITIS SAMBODO (PBSJ UNNES)

(dilarang mengcopy tanpa ijin)

Semaken video crita rakyat RAWA PENING iki!

CRITA WAYANG MAHABHARATA

sumber video : skripsi SETYANI PBSJ UNNES 

(dilarang mengcopy tanpa ijin)

Semaken video crita wayang BIMA BUNGKUS iki!